Ұлттық аккредиттеу орталығы Қазақстан Республикасының ұлттық аккредиттеу жүйесін дамытуға және нығайтуға үлес қосып жүрген кәсіби мамандармен таныстыруды жалғастыруда.
Қазақстан Республикасының Ұлттық аккредиттеу органы командасының мүшесі Жазира Ермұхаметова ветеринариялық санитария, азық-түлік қауіпсіздігі, зертханалық қызмет, ғылым және білім беру салаларында мол кәсіби тәжірибеге ие.
2003 жылы Жазира Ермұхаметова Шәкәрім атындағы Семей мемлекеттік университетін «Ветеринариялық санитария» мамандығы бойынша ветеринариялық-санитариялық дәрігер біліктілігімен тәмамдады. 2009 жылы «Азық-түлік қауіпсіздігі» бағыты бойынша диссертация қорғап, ветеринария ғылымдарының кандидаты ғылыми дәрежесін алды. Сонымен қатар, «Құқықтану» мамандығы бойынша екінші жоғары білімі бар.
Кәсіби еңбек жолын 2003 жылы Республикалық ветеринариялық зертхананың Павлодар облыстық филиалында бастады. Зертханалық саладағы 15 жылдан астам еңбек тәжірибесі барысында паразитолог дәрігерден зертхана меңгерушісіне дейінгі кәсіби жолдан өтті.
2018–2023 жылдары «Ұлттық сараптама орталығы» РМК-ның Павлодар облысы бойынша филиалының бактериологиялық зертханасын басқарды.
2023–2025 жылдары ғылыми-білім беру саласындағы кәсіби қызметін жалғастырып, Павлодар қаласындағы Торайғыров университетінің биотехнология кафедрасында қауымдастырылған профессор қызметін атқарды.
Жазира Ермұхаметованың кәсіби қызметінде ғылыми жұмысқа да ерекше орын беріледі. Ол 17 ғылыми мақаланың, оның ішінде халықаралық Scopus дерекқорында индекстелетін басылымдарда, сондай-ақ Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті ұсынған ғылыми журналдарда жарияланған еңбектердің авторы.
Сонымен қатар, Жазира Ермұхаметова сынақ жүргізудің жаңа әдістеріне арналған бес куәліктің және №048694 Еуразиялық өнертабыс патентінің авторы болып табылады.
Ғылыми және білім беру саласындағы тәжірибесі аттестаттау комиссияларының жұмысына қатысуымен де толықты. Жазира Ермұхаметова Семей қаласындағы Shakarim University-де магистрлік диссертацияларды қорғау жөніндегі аттестаттау комиссияларының төрағасы қызметін атқарады.
2022 жылғы шілдеден бастап Жазира Ермұхаметова Қазақстан Республикасының Ұлттық аккредиттеу органы жүйесінде қызмет атқарып келеді. Осы кезеңде ол жинақтаған кәсіби білімі мен зертханалық және ғылыми тәжірибесін аккредиттеу саласында тиімді қолдануда.
Зертханалық қызметтегі практикалық тәжірибенің, ғылыми біліктіліктің және азық-түлік қауіпсіздігі саласындағы құзыреттіліктің үйлесуі Жазира Ермұхаметоваға бағалау қызметін дамытуға және Қазақстанның ұлттық аккредиттеу жүйесін жетілдіруге елеулі үлес қосуға мүмкіндік береді.