ISO 37001:2025 «Парақорлыққа қарсы іс-қимыл менеджменті жүйелері. Талаптар және қолдану жөніндегі нұсқаулық» халықаралық стандартының жаңа нұсқасы жарияланды. Жаңа редакция ISO 37001:2016 стандартының қолданыстағы нұсқасын алмастырады.
Қазақстанда халықаралық стандарттың өзекті нұсқасына көшу халықаралық нұсқамен бірдей СТ РК ISO 37001-2025 ұлттық стандарты арқылы жүзеге асырылады.
Стандарттың жаңартылуы парақорлыққа қарсы іс-қимыл менеджменті жүйесін басқару тәсілдерін жетілдіруге және оның нәтижелілігін арттыруға бағытталған.
Негізгі өзгерістер
Стандарттың жаңа нұсқасында мына бағыттарға ерекше назар аударылады:
- сыбайлас жемқорлық тәуекелдерін бағалау тәсілдерін өзектендіру;
- басшылықтың сыбайлас жемқорлыққа қарсы мәдениетті қалыптастырудағы рөлін күшейту;
- іскерлік серіктестер мен контрагенттерді тексеру рәсімдерін жетілдіру;
- ішкі процестерді, рәсімдер мен қызметкерлерді оқыту бағдарламаларын қайта қарау;
- жүйенің нәтижелілігін бақылауды және тұрақты жетілдіру қағидаттарын күшейту.
Сертификатталған ұйымдарға не істеу қажет?
Стандарттың алдыңғы нұсқасы бойынша қолданыстағы сертификаты бар ұйымдарға:
- СТ РК ISO 37001-2025 талаптарын зерделеп, сәйкестікке талдау (gap-талдау) жүргізу;
- жауапты тұлғалар мен іс-шараларды орындау мерзімдерін көрсете отырып, көшу жоспарын әзірлеу;
- қызметкерлерді қажетті оқытудан өткізу;
- менеджмент жүйесінің құжаттамасы мен ішкі процестерін өзектендіру;
- тиісті сәйкестікті бағалау рәсімінен өту ұсынылады.
Стандарттың жаңа нұсқасына көшу белгіленген талаптарға сәйкес жоспарлы инспекциялық, қайта сертификаттау немесе жоспардан тыс аудит шеңберінде жүзеге асырылады.
Сәйкестікті растау органдары үшін көшу тәртібі
Сәйкестікті растау органдары үшін де СТ РК ISO 37001-2025 стандартына көшуге байланысты арнайы іс-шаралар көзделген.
Аталған жұмыстар IAF MD 30:2025 талаптарын және «Ұлттық аккредиттеу орталығы» РМК-ның СТ РК ISO 37001-2025 стандартына көшу жөніндегі саясатын ескере отырып жүзеге асырылады.
Стандарттың өзекті нұсқасына көшу — менеджмент жүйесінің заманауи талаптарға сәйкестігін қамтамасыз етудің маңызды кезеңі. Жаңа талаптарды енгізу сыбайлас жемқорлыққа қарсы тетіктерді жетілдіруге, менеджмент жүйесінің нәтижелілігін арттыруға және ұйымға деген сенімді нығайтуға мүмкіндік береді.