2026 жылғы 28 қазанда Қазань қаласында (Ресей Федерациясы) Ислам елдерінің стандарттау және метрология институтының (SMIIC) 21-ші Бас Ассамблеясының отырысы өтті.
Қазақстан делегациясының құрамында отырысқа Қазақстан Республикасы Ұлттық аккредиттеу орталығының өкілдері: Бас директордың бірінші орынбасары Е. Ж. Қарасаев пен Сертификаттау органдарын аккредиттеу басқармасының басшысы А. Жанатханұлы қатысты.
SMIIC – Ислам Ынтымақтастығы Ұйымының (ИҰҰ) үлестес құрылымы болып табылады және құрамына 46 мүше мемлекет кіреді. Институт ислам әлеміндегі стандарттарды үйлестірудің, метрологияны, сәйкестікті бағалауды және халал инфрақұрылымын дамытудың негізгі алаңы ретінде әрекет етеді.
Отырыс барысында келесі мәселелер қаралды:
-SMIIC қызметі туралы жылдық есеп, стандарттау, метрология және аккредиттеу кеңестерінің есептері;
-Аудиттелген қаржылық есептілік пен бюджетті бекіту;
-SMIIC-тің 2021–2030 жылдарға арналған Стратегиялық жоспарын іске асыру;
-OIC/SMIIC халал стандарттары жүйесін және сертификаттарды өзара тану механизмдерін дамыту;
-Мүше мемлекеттердің техникалық ынтымақтастығы, әлеуетін арттыру және кадрлар даярлау;
-ISO, GSO, UNIDO және IFHAB халықаралық ұйымдарымен ынтымақтастықты кеңейту.
Қазақстан делегациясының SMIIC 21-ші Бас Ассамблеясының жұмысына қатысуы стандарттау саласындағы халықаралық ынтымақтастықты одан әрі нығайтуға, экспорттық әлеуетті дамытуға және халал өнімдерінің сәйкестігін бағалаудың ұлттық жүйесіне деген сенімді арттыруға ықпал етеді.
Дополнительно

