Ұлттық аккредиттеу орталығы (ҰАО) «Ақпараттық қауіпсіздік, киберқауіпсіздік және құпиялылықты қорғау. Құпия ақпаратты басқару жүйелері. Талаптар және қолдану жөніндегі нұсқаулық» ISO/IEC 27701:2025 халықаралық стандартына арналған оқыту семинарын өткізді.
Семинардың лекторы – Қытай Халық Республикасының аккредиттеу жөніндегі ұлттық қызметінің (CNAS) ақпараттық қауіпсіздік, киберқауіпсіздік және дербес деректерді қорғау саласындағы сарапшысы LI Zhigange.
Іс-шараға Қазақстан Республикасы Жасанды интеллект және цифрлық даму министрлігінің, Қазақстан Республикасы Ұлттық Банкінің, «Ұлттық ақпараттық технологиялар» АҚ-ның, сондай-ақ басқа да мемлекеттік органдардың, ұлттық компаниялардың және ақпараттық қауіпсіздік саласындағы аккредиттеу субъектілерінің өкілдері қатысты.
Семинар барысында қатысушылар ISO/IEC 27701:2025 стандартының өзекті талаптарымен, оны қолданудың халықаралық тәжірибесімен, сондай-ақ құпия ақпаратты басқару жүйелерін енгізу тәжірибесімен танысты.
Сонымен қатар, ұйымдарда құпиялылық пен дербес деректерді қорғауды тиімді басқару, ақпараттық қауіпсіздікті қамтамасыз ету тетіктерін жетілдіру мәселелеріне ерекше назар аударылды.
Цифрлық технологиялардың қарқынды дамуы жағдайында ақпараттық қауіпсіздік пен дербес деректерді қорғау мәселелерінің маңызы артып келеді. Қазақстанда цифрлық инфрақұрылым мен мемлекеттік ақпараттық жүйелердің қауіпсіздігін қамтамасыз ету бағытында жүйелі жұмыстар жүргізілуде.
Семинар қатысушыларға халықаралық тәжірибемен және ақпаратты қорғаудың заманауи тәсілдерімен танысуға мүмкіндік берді. Алынған білім мен практикалық ұсынымдар Қазақстанда дербес деректерді қорғау жүйесін одан әрі жетілдіруге және ақпараттық қауіпсіздік инфрақұрылымын дамытуға бағытталған жұмыстарда қолданылуы мүмкін.
ҰАО аккредиттеу, ақпараттық қауіпсіздік және құпия ақпаратты қорғау салаларында мамандардың кәсіби құзыреттерін арттыру және халықаралық тәжірибені енгізу бағытындағы жұмыстарды жалғастыруда.