Қазақстанның туристік саласы өсіп келеді: 2026 жылдың 1 сәуіріндегі жағдай бойынша елде 4 505 орналастыру нысаны болды, бұл бір жыл бұрынғымен салыстырғанда 192-ге артық. 2025 жылы елге 15,7 млн шетелдік қонақ келді, ал ішкі туристік ағын 8,6 млн адамды құрады. Келесі кезең тек қонақүйлер санын көбейту ғана емес, сонымен қатар сервис сапасының болжамдылығын арттыру болып табылады. ISO 22483:2020 халықаралық стандарты қонақүй қызметінің сапасын субъективті санаттан нақты талаптар мен тексерілетін процестер жүйесіне ауыстырады: ол персоналдың жұмысын, қызмет көрсетуді, тазалықты, қауіпсіздікті, техникалық қызмет көрсетуді, тамақтануды, жабдықтауды және қонақтардың пікірлерімен жұмыс істеуді қамтиды. Стандарт кез келген санаттағы қонақүйлерге қолданылады, мердігерлердің қызметтеріне таралады және Қазақстан Республикасы заңнамасының міндетті талаптарын алмастырмай, оларды сапаның халықаралық шеңберімен толықтырады.
ҰАО (Ұлттық аккредиттеу орталығы) осы схеманы енгізу үшін инфрақұрылымды дәйекті түрде дайындауда. Қазақстанда ISO 22483:2020 негізінде ұлттық стандарт әзірленіп жатыр, оны 2026 жылдың соңына қарай бекіту жоспарлануда. Сонымен қатар, ҰАО сәйкестікті бағалаудағы құзыреттілікті қалыптастыруда: 2025 жылдың қазан айында Орталықтың бағалаушылары Түркияда тәжірибелік тағылымдамадан өтіп, сол жерде SYM Belgelendirme сертификаттау жөніндегі органы жүргізген ISO 22483:2020 стандарты бойынша Karpalas City Hotel & Spa қонақүйінің аудитін бақылады. Аудит барысында нақты процестер тексерілді: орналастыру, санитарлық тазалық, техникалық қызмет көрсету, тамақтану, кір жуу орны, SPA, қоймалар және нөмірлер қоры. ҰАО жүйелі ішкі аудитке және басшылық тарапынан жасалатын талдауға ерекше назар аударды. Бұл тәжірибе Қазақстанда формальды белгілерге емес, нақты қонақүй процестеріне негізделген бағалау тәжірибесін құруға мүмкіндік береді. Жүйедегі ҰАО рөлі оның функцияларымен айқындалады: сертификаттау жөніндегі органдарды аккредиттеу, олардың құзыреттілігін растау және қажетті инфрақұрылымды дамыту.
Схеманы енгізу бірыңғай тізбек ретінде құрылады: мемлекеттік саясат және стандарттау, ҰАО аккредиттеуі, сертификаттау жөніндегі органдардың тәуелсіз сертификаттауы, қонақүйлердің талаптарды енгізуі және туристердің кері байланысы. Жүйені іске қосу үшін ұлттық стандартты әзірлеуді аяқтау, сертификаттау жөніндегі органдардың қызмет ету аясын кеңейту, сарапшы-аудиторларды дайындау, сертификаттау схемасын бекіту, сондай-ақ апробацияға қонақүйлер мен кәсіби бірлестіктерді тарту қажет. ҰАО үшін бұл – сәйкестікті бағалау органдарының құзыреттілігін дамытудың жаңа бағыты, сертификаттау жөніндегі органдар үшін – қызметтер мен аккредиттеудің перспективалы саласы, ал қонақүйлер үшін – сапаны басқару және қонақтардың сенімін арттыру құралы. Маңыздысы, сертификаттау формалдылық емес, басқарылатын сервис сапасының нақты дәлеліне айналуы тиіс.
Дополнительно

