Ұлттық аккредиттеу орталығы «20 жаңа бағалаушы» жобасының қатысушыларымен таныстыруды жалғастырады. Бүгін зертханалық салада 20 жылдан астам практикалық тәжірибесі бар маман Надежда Маракаеваны таныстырамыз.
Надежда Маракаева Қазақстан инновациялық және телекоммуникациялық жүйелер университетін «Экология» мамандығы бойынша тәмамдаған.
Еңбек жолын 2002 жылы «Ақтөбе ЖЭО» АҚ-да табиғи газды химиялық талдау зертханашысы қызметінен бастаған. Қазіргі уақытта осы кәсіпорында жұмысын жалғастырып, сынақ зертханасының басшысы және сапа жөніндегі менеджер қызметтерін қатар атқарады.
2015 жылдан бастап Надежда Маракаева Ұлттық аккредиттеу органы тарапынан техникалық сарапшы ретінде тартылады. Осы кезең ішінде ол аккредиттеу субъектілерін бағалаудың көптеген рәсімдеріне қатысып, сынақ зертханаларының қызметі мен менеджмент жүйесі талаптарын қолдану саласында елеулі практикалық тәжірибе жинақтады.
Зертханалық саладағы көпжылдық еңбек тәжірибесі, сынақ зертханасын басқару тәжірибесі, сапа менеджменті жүйесінің талаптарын білуі және бағалау рәсімдеріне қатысуы Надежда Маракаеваның бағалаушы ретінде одан әрі тиімді жұмыс істеуіне берік кәсіби негіз қалыптастырады.
Тәжірибелі мамандардың «20 жаңа бағалаушы» жобасына қатысуы Ұлттық аккредиттеу орталығының сараптамалық әлеуетін кеңейтуге және ұлттық аккредиттеу жүйесін одан әрі дамытуға бағытталған.